जेष्ठ १७, नेपाल स्टक एक्सचेन्जमा आइतबार भएको कारोबारमा नेप्से परिसूचक १० महिनायताकै ठूलो अंकले बढेर उल्लेख्य वृद्धि भएको छ ।  आइतबार नेप्से परिसूचक करिब २७ अंकले बढेको छ भने कारोबार रकम १२ करोड रुपैयाँ पुगेको छ ।

कारोबार रकमको ठूलो हिस्सा सानिमा विकास बैंकको संस्थापक सेयरले ओगटेको छ । सानिमाको संस्थापक सेयर १३ करोबारबाट ८ करोड ८० लाख रुपैयाँ बराबरको ३ लाख २० हजार कित्ता खरिद–बिक्री भएको छ । आइतबार ६४ कम्पनीको ५ सय ४२ कारोबारबाट १२ करोड ३४ लाख ३ हजार रुपैयाँ बराबरको ३ लाख ७४ हजार ३ सय ४९ कित्ता सेयर किनबेच भएको थियो । बुधबारको तुलनामा कारोबार रकम करिब तीन गुनाले बढी हो ।

आइतबार कारोबारको समयमा पनि स्टक एक्सचेन्जले परिसूचकमा आकस्मिक परिवर्तन आएपछि २ पटकसम्म कारोबार रोकेको थियो । आइतबार बजार खुल्दा ४७९.४ अंकमा रहेको नेप्से कारोबार बन्द २६.९५ अंकले बढेर ५०६.३५ अंकमा पुगेको थियो ।

स्ट्यान्डर्ड चार्टर्ड बैंक, नबिल बैंक, एभरेष्ट बैंक, चिलीमे हाइड्रो पावर, बैंक अफ काठमाण्डू लगायतका ५५ कम्पनीको सेयर मूल्य बढेको थियो भने नबिल बैंकको संस्थापक सेयर, राष्ट्रिय बिमा संस्थान, हिमचुली विकास बैंक, एसियन लाइफ इन्स्योरेन्स, सेन्ट्रल फाइनान्स, युनाइटेड फाइनान्स र पिपुल्स फाइनान्सको सेयर मूल्य घटेको थियो । रघुपति जुट मिल र सानिमा विकास बैंकको संस्थापक सेयरको सेयर मूल्यमा भने कुनै परिवर्तन आएन ।