२०६३।०६४ देखि नै टेलिकम अग्रणी हिमालयन र एभरेष्ट बैंक ठूला १० करदाताबाट हटे युनाइटेड स्पिरिट्स नेपाल र राष्ट्रिय बिमा संस्थान थप कमला थापा काठमाडौं, ११ साउन सरकारलाई कर बुझाउने ठूला करदातामध्ये गत आर्थिक वर्षमा पनि नेपाल टेलिकमले सबैलाई पछाडि पारेको छ । ९ अर्ब ६८ करोड ८५ लाख कर तिरेर टेलिकम पहिलो नम्बरमा परेको हो । अघिल्लो वर्षभन्दा २६ प्रतिशतले बढी राजस्व तिरेर टेलिकम लगातार चौथो पटक ठूला करदातामध्ये पहिलो नम्बरमा रहेको हो । अघिल्लो वर्ष टेलिकमले ७ अर्ब ६३ करोड, २३ लाख कर बुझाएको थियो । सरकारले ठूला करदाताहरूको विवरण अद्यावधिक गर्न थालेको आर्थिक वर्ष २०६३÷०६४ देखि नै टेलिकम अगाडि रहेको छ । आन्तरिक राजस्व विभागले उपलब्ध गराएको गत आवको असार मसान्तसम्मको राजस्व संकलनका आधारमा सूर्य नेपाल प्रालिले ४ अर्ब ९६ करोड ६५ लाख रुपैयाँ कर बुझाएर दोस्रो नम्बरमा परेको छ । सूर्य नेपाल अघिल्लो वर्ष १ अर्ब ५४ करोड १९ लाख रुपैयाँ राजस्व बुझाएर तेस्रो नम्बरमा थियो । यो वर्ष सूर्य नेपालले बुझाउने राजस्वमा २ सय २२ प्रतिशतले वृद्धि भएको छ । अघिल्लो वर्ष १ अर्ब ८१ करोड ५४ लाख राजस्व बुझाएर दोस्रो नम्बरमा रहेको स्पाइस नेपाललाई यो वर्ष सूर्य नेपालले प्रतिस्थापन गरेको हो । स्पाइस यो वर्ष चौथो नम्बरमा परेको छ । गोर्खा बु्रअरी प्रालि यो वर्ष २ अर्ब ४६ करोड ७५ लाख रुपैयाँ राजस्व बुझाएर तेस्रो नम्बरमा पुगेको छ । गोर्खा बु्रअरी अघिल्लो वर्ष ७८ करोड ६० लाख बुझाएर चौथो नम्बरमा थियो । यो बु्रअरीको अघिल्लो वर्षभन्दा २ सय १२ प्रतिशतले राजस्व वृद्धि भएको थियो । स्पाइस नेपालले यो वर्ष २ अर्ब ७ करोड ६३ लाख रुपैयाँ राजस्व बुझाएको छ । यो कम्पनीको अघिल्लो वर्षको तुलनामा सरकारलाई बुझाएको राजस्वको वृद्धिदर १४ प्रतिशत छ । अघिल्लो वर्ष सातौं स्थानमा रहेको नेपाल इन्भेस्टमेन्ट बैंक ४१ प्रतिशतको वृद्धिसहित पाँचौं नम्बरमा आएको छ । यो वर्ष इन्भेस्टमेन्टले ७९ करोड ९ लाख रुपैयाँ सरकारलाई बुझाएको छ । अघिल्लो वर्ष इन्भेस्टमेन्टले ५६ करोड ८ लाख रुपैयाँ राजस्व बुझाएको थियो । अघिल्लो वर्ष पाँचौं नम्बरमा रहेको नबिल बैंक यो वर्ष छैटौं नम्बरमा पुगेको छ । अघिल्लो वर्ष ६३ करोड ४ लाख राजस्व बुझाएको नबिलले यो वर्ष ७५ करोड ६० लाख रुपैयाँ बुझाएको छ । नबिलले अघिल्लो वर्षभन्दा १९ प्रतिशतले बढी राजस्व बुझाएको हो । अघिल्लो वर्ष ५९ करोड ८६ लाख कर तिरेर छैटौं स्थानमा रहेको स्टान्डर्ड चार्टर्डले यो वर्ष ६६ करोड ५३ लाख कर बुझाएर सातौं स्थानमा झरेको छ । अघिल्लो वर्ष बढी कर बुझाउने १० कम्पनीमा नपरेको मदिरा उत्पादक कम्पनी युनाइटेड स्पिरिट्स नेपाल प्रालिले यो वर्ष सरकारलाई बुझाउने करमा अघिल्लो वर्षभन्दा २ सय ६४ प्रतिशतले वृद्धि गरी आठौं नम्बरमा चढेको छ । कम्पनीले अघिल्लो वर्ष १७ करोड ५८ लाख राजस्वमात्र बुझाएकामा यो वर्ष ६२ करोड १ लाख रुपैयाँ पुगेको छ । ठूला करदातामध्ये अघिल्लो वर्ष आठौं स्थानमा रहेको राष्ट्रिय वाणिज्य बैंक यो वर्ष नवौं स्थानमा झरेको छ । यो बैंकले अघिल्लो वर्षभन्दा १० प्रतिशतले बढी राजस्व बुझाएको हो । अघिल्लो वर्ष ५५ करोड ७५ लाख रुपैयाँ राजस्व बुझाएको रावा बैंकले यो वर्ष ६१ करोड २० लाख रुपैयाँ राजस्व बुझाएको छ । त्यसैगरी सरकारलाई कर बुझाउने ठूला करदातामा यो वर्ष राष्ट्रिय बिमा संस्थान पनि थपिएको छ । अघिल्लो वर्ष २२ करोड ४८ लाख रुपैयाँ राजस्व बुझाएको संस्थानले अघिल्लो वर्षभन्दा १ सय ४५ प्रतिशत बढी अर्थात् ५४ करोड २४ लाख रुपैयाँ राजस्व बुझाएर १० औं नम्बरमा उक्लिएको छ । सरकारले वार्षिक २५ करोड रुपैयाँभन्दा बढी कारोबार गर्ने कम्पनीलाई ठूला करदाताअन्तर्गत राखेको छ । ठूला करदाताको संख्या गत आर्थिक वर्षको असार मसान्तसम्म ४ सय १४ पुगेको ठूला करदाता कार्यालयले जनाएको छ । अघिल्लो वर्ष ३ सय २७ वटा ठूला करदाता रहेकामा यो वर्ष १ सयवटा थपिएका हुन् । लगातार ३ वर्षसम्म २५ करोडभन्दा कम कारोबार गर्ने १२ वटा कम्पनी गत आर्थिक वर्षमा ठूला करदाताबाट हटेका छन् ।